මීට පස්සේ හොරෙක් ආවොත් ඇඟට උණු වතුර එකක් දාන්න..

අද දවසට මී පැටියාගේ දෙවනි පෝස්ට් එක. මී පැටියා දියුණු වෙනවා.

තරුවගේ මේ පෝස්ට් එක දැකලා තමයි මේක මතක් වුනේ..

-------------------------------------------------------------------------------------------------------

මේ සිද්දිය වුනේ 2007 විතර. ඒ කියන්නේ මී පැටියා ඕලෙවල් කරන කාලේ. සුනාමියෙන් පස්සේ මී පැටියා ඇතුලු පවුලේ උදවිය රට ඇතුලට වෙන්න තියෙන ගෙයකට ගියා. ඒ ගෙදර පදිංචියට ගිහින් හරියටම සති 2කින් තමයි මේක වුනේ.

වෙලාව රෑ 12.30 විතර ඇති. ගෙදර හැමෝම දොයි. අපේ තාත්තා බාත් රූම් යන්න නැගිටල තියෙනවා.

තාත්තාට ඇහිලා තියෙනවා මගේ කාමරේ ජනේලේ හරියෙන් සද්දයක්. තාත්තා ඇවිත් කර්ටන් එක අයින් කරලා බලලා. කවුද මිනිහෙක් ජනේලේ එල්ලිලා ඉන්නවලු. තාත්තා හයියෙන් කෑ ගහලා අහලා කවුද කියලා. ඌ පැනලා දුවලා.

තාත්තාගේ සද්දෙට තමයි මට ඇහැරුනේ. ටිකකින් අම්මත් ආවා.

ටිකකින් මෙන්න වූ ආයෙත් එනවා. මේ පාර ටී ෂර්ට් එකෙන් මූණ වහගෙන. තාත්තා ඒපාර ටෝච් එක ඇල්ලුවා ජනේලෙන්ම. ඒ පාර ඌ ආයෙත් පැනලා දිව්වා.

අලුත් නිසා ඒ පැත්ත ගැන අපිට ඒ හැටි දැනුමක් තිබුනෙත් නෑ ඔය කාලේ. ඒක නිසා අපි කෝල් කරා ලඟ පාත ඉන්න අඳුරන මනුස්සයෙකුට.

මෙන්න ඒ පාර ඒ ගොල්ල එනවා කැබ් එකක් පුරෝලා මිනිස්සු අරගෙන. 6 දෙනෙක් විතර. දැන් හොරාව අල්ල ගන්න වගේ ආවේ. ඒත් ඉතින් වැඩක් නෑනේ. හොරා පැනලා ගිහින් ඉවරයිනේ..

දැන් සිද්දිය පොලිස්සියට කියන්නත් ඕනනේ. පොලිස්සියෙන් අල්ල ගනීනේ හොරාව. එක එක කට්ටිය එක එක අදහස් දානවා. අඳුරන කෙනෙක් මාර්ගෙන් යමු, අපිම පොලිස්සියට යමු ආදී දේවල්. මී පැටියත් නිකන් හිටියේ නෑ. දැම්ම අදහසක්.

"අපි 119 කෝල් කරලා කියමු."

අම්මට සිරි, හැමෝගෙන්ම අනුමැතිය හම්බ වුනා. ඉතින් කෝල් කරා 119. ඔක්කොම විස්තර කිව්වා.

පැයකින් විතර පොලිස් ජීප් එකක් ආවා විදුලි වේගෙන්. අපි හිතුවා බැටෑලියන් එකක්ම එනවා ඇති කියලා. හොරාව අදනම් අතටම අල්ල ගනීවි.

ජීප් එක පුරෝලා පොලිස් නිලධාරීන් 2නෙක් ඇවිත් තිබුනා. එක්කෙනෙක් අතේ වෙපන් එකකුත් තිබුනා.

ඇවිත් සාලෙන් වාඩි වුනා.  අම්ම හදලා දුන්න තේ දෙකත් බිව්වා. මේ ඉඩමේ පර්ච් එකේ ගානත් ඇහුවා.

දෙන්නම නැගිට්ටා.

"මීට පස්සේ හොරෙක් ආවොත් වතුර එකක් උණු කරලා හොරාගේ ඇඟට දාන්න" කියලා ජීප් එකට නැගලා ආපු විදියටම යන්න ගියා.